Ոչ եւս է Ալվարդ Պետրոսեան

10 մարտ 2022-ին իր մահկանացուն կնքեց գրող, արձակագիր, հրապարակախօս, հասարակական-քաղաքական գործիչ, Հայաստանի մշակոյթի վաստակաւոր գործիչ, Հայաստանի Հանրապետութեան Պատուոյ շքանշանակիր, Հ.Յ.Դաշնակցութեան անդամ Ալվարդ Պետրոսեան:
Ալվարդ Պետրոսեան ծնած է 4 հոկտեմբեր 1946-ին, Երեւան: Շիրվանզադէի անուան դպրոցը աւարտելէ ետք, 1968-ին աւարտած է Երեւանի պետական համալսարանի բանասիրական բաժանմունքը:
1969-էն 1975 աշխատած է Պատկերասփիւռի եւ ձայնասփիւռի պետական կոմիտէին մէջ իբրեւ խմբագիր: 1975-էն 1979 աշխատած է «Հայաստանի աշխատաւորուհի» ամսագիրին մէջ:
1978-էն Խորհրդային Միութեան գրողներու միութեան անդամ էր:
1980-էն 1981 աշխատած է Սփիւռքահայութեան հետ մշակութային կապի կոմիտէին մէջ: 1982-էն 1990` «Սովետական գրականութիւն» («Նորք») գրական-գեղարուեստական ամսագիրի գլխաւոր խմբագիրի տեղակալ, 1990-էն 1994` «Առագաստ» շաբաթաթերթի գլխաւոր խմբագիր:
Բացի իր գրական երկերէն, — պատմուածքներ, քերթուածներ, փորձագրութիւններ, թատրերգութիւններ, որոնք ամփոփուած են 8 հատորներու մէջ, — Ալվարդ Պետրոսեան ունի նաեւ բազմատասնեակ հրապարագրական գրութիւններ ցրուած հայ մամուլի էջերուն վրայ։
Ալվարդ Պետրոսեան վարած է նաեւ հասարակական եւ քաղաքական բուռն գործունէութիւն։ Անդամ էր Հ.Յ.Դաշնակցութեան ընդյատակեայ շրջանէն սկսեալ։ 1994-էն 1998 վարած է Հայ օգնութեան միութեան Հայաստանի շրջանային վարչութեան ատենապետութիւնը, իսկ 1998-ին ընտրուած է ՀՕՄ Կեդրոնական վարչութեան անդամ։
ՀՀ Ազգային Ժողովի պատգամաւոր էր 1999-էն 2012, Հ.Յ.Դաշնակցութեան ընտրացուցակով, եւ մաս կազմած է Ազգային ժողովի սոցիալական, առողջապահութեան և բնութեան պահպանութեան հարցերու մշտական յանձնաժողովին, ինչպէս նաեւ Մարդու իրաւունքներու պաշտպանութեան և հանրային հարցերու մշտական յանձնաժողովին։
Ընթերցողին կը ներկայացնենք 1968-ին «Գարուն» ամսագրին մէջ լոյս տեսած իր «Երեւանեան մանրանկարներ» պատկերաշարքը, ինչպէս նաեւ իր մահուան առթիւ Հայաստանի հանրային ռադիոյէն սփռուած Արմինէ Գէորգեանի հաղորդումը։

 

Leave a Reply

Your email address will not be published.