ԵՐԵՒԱՆ — Յուլիսի 3-ին Հայաստանի գրողների միութեան (ՀԳՄ) կլոր սրահում տեղի ունեցաւ Միութեան եւ «Մեծն Ներսէս» բարեսիրական կազմակերպութեան համատեղ «Յանուն հայի յարատեւման» 2026 թ. գրական մրցանակաբաշխութեան մրցանակների յանձնումը: Մրցանակաբաշխութիւնը կազմակերպւում է Հիւսիսային Ամերիկայի Արեւելեան Թեմի Ազգային առաջնորդարանի հովանաւորութեամբ 2023 թ.-ից: ՀԳՄ նախագահ Էդուարդ Միլիտոնեանը շնորհաւորեց մրցանակակիրներին՝ նշելով աւանդոյթ դարձող մրցանակաբաշխութեան կարեւորութիւնը ժամանակակից գրողներին աջակցելու եւ նրանց նոր ստեղծագործութիւնները ընթերցողներին ներկայացնելու առումով: Նա կարեւորեց նաեւ անցեալ տարուայ մրցանակակիրների ստեղծագործութիւնների ժողովւածուի հրատարակումը, որը կազմել եւ խմբագրել է Լիլիթ Գալստեանը:
Հիւսիսային Ամերիկայի Արեւելեան Թեմի առաջնորդ Տ. Անուշաւան արք. Դանիէլեանն իր խօսքում նշեց. «Դարերէն եկած եւ դարեր գնացող մեր գոյութեան մնայուն, հարազատ պահապանները հայ գրողներն են։ Ինչպէս եկեղեցին հաւատքի տաճարն է, նոյնպէս մեր մտքի եւ լոյսի տաճարն այս տունն է։ Ուրախ եմ, որ «Յանուն հայի յարատեւման» մրցանակաբաշխութիւնը հաստատուեցաւ։ Պատգամը խորն է, եւ վստահ եմ, որ ան ակօսներ պիտի բանայ մեր կեանքին մէջ, ուր պիտի ցանուին նորանոր սերմեր»:
«Մեծն Ներսէս» բարեսիրական կազմակերպութեան տնօրէն Տիգրան Գալստեանը ներկայացրեց մրցանակակիրներին՝ նշելով, որ աւելացուել է նաեւ դրամատուրգիայի անուանակարգը:
Գրականագէտ, բ.գ.թ., յանձնաժողովի անդամ Արքմենիկ Նիկողոսեանը խօսեց յանձնաժողովի աշխատանքների մասին՝ հաւաստելով, որ մրցանակները տրուել են ներկայացուած աշխատանքների համակողմանի դիտարկմամբ, եւ նշելով ներկայացուած ստեղծագործութիւնների տարեցտարի նկատելի բարձրարժէքութեան մասին, որը վկայում է տպագրուած անթոլոգիան:
Էդուարդ Միլիտոնեանը, Տ. Անուշաւան արք. Դանիելեանը եւ Տիգրան Գալստեանը յանձնեցին մրցանակները:
Մրցանակներ շնորհուեցին արձակ, պոեզիա, դրամատուրգիա եւ մանկապատանեկան անուանակարգերում: Տրուեցին հետեւեալ մրցանակները.
Արձակ
1-ին մրցանակ — Նորեկ Գասպարեան
2-րդ – 3-րդ մրցանակ — Հերմինէ Աւագեան
2-րդ – 3-րդ մրցանակ — Յասմիկ Կարապետեան
Յատուկ մրցանակ — Հրանուշ Սուքիասեան
Պոեզիա
1-ին մրցանակ — Վարդ Արծափէ (Վարդուհի Գէորգեան)
2-րդ մրցանակ — Ռոբերտ Եսայեան
3-րդ մրցանակ — Ալիսա Բաղդասարեան
Յատուկ մրցանակ — Խաչիկ Մանուկեան
Յատուկ մրցանակ — Հայկ Սիրունեան
Դրամատուրգիա
1-ին մրցանակ — Էլֆիք Զոհրաբեան
2-րդ մրցանակ — Յակոբ Յարութեան
3-րդ մրցանակ — Յովիկ Վարդումեան
Մանկապատանեկան
1-ին մրցանակ — Ռոլանդ Շառոյեան
2-րդ – 3-րդ մրցանակ — Պերճուհի Աւետեան
2-րդ – 3-րդ մրցանակ — Սաթենիկ Ղազարեան
Յատուկ մրցանակ — Սերժ Մանուկեան
Յատուկ մրցանակ — Ալվարդ Յովսէփեան
(«Գրական թերթ»)